ஐடி துறை கேப்டன்களும் இந்திய பிளேயர்களும்

உலகளவில் தகவல் தொழில்நுட்பத்தின் முதன்மையான நிறுவனங்களைப் பற்றியும், இந்திய ஐடி துறையின் (Information Technology) தற்போதைய நிலையைப் பற்றியும் பார்க்குமுன், எந்த நிறுவனங்களைத் தகவல் தொழில்நுட்ப நிறுவனங்கள் (ஐடி) என்று வரையறுப்பது? "தகவலை கணினி பொருட்கள் கொண்டு கையாள உதவும் நிறுவனங்கள்" எனும் ஆக்ஸ்போர்டு அகராதியின் விளக்கத்தையே எடுத்துக்கொள்ளலாம். மின்னணு சாதனங்கள், இணையம், கணினி சாதனங்கள், தகவல் தொடர்பு, மின் வர்த்தகம் (e-commerce), செமிகண்டக்டர், மென்பொருள், ஐடி சர்வீசஸ் ஆகியவற்றை அடிப்படையாகக் கொண்டு இயங்கும் நிறுவனங்கள் இதில் அடங்கும். இதிலும் பெரும்பாலும் முதல் பத்து இடங்களில் வருவாய் அடிப்படையில் மின்னணு சாதனங்களை விற்கும் நிறுவனங்களே வரும். ஒரு இயங்குதளத்தை விற்பதை விட லேப்டாப் விற்றால் அதிக வருவாய் அல்லவா? அதனால் ஒவ்வொரு வகைமையின் கீழும் இரண்டு, மூன்று பெரிய நிறுவனங்களைப் பற்றிப் பார்த்தால் கிட்டத்தட்ட ஐடி துறையின் பெரும்பாலான பகுப்புகளைப் பற்றி ஒரு பறவைப்பார்வை கிடைத்துவிடும். 

மின்னணு சாதனங்கள்:

இத்துறை நிறுவனங்களுக்குத் தான் இன்றைய தேதியில் பணப்புழக்கம் அதிகம். கிட்டத்தட்ட அனைவருமே ஸ்மார்ட்போன், டேப்லட் என்று வாங்க ஆரம்பித்துவிட்டதால் இவர்கள்தான் வருவாயில் முதலிடத்தில் உள்ளனர்.

1. சாம்சங், தலைமையகம்: தென் கொரியா, தொடங்கிய ஆண்டு: 1969

வீட்டு உபயோக மின் சாதன உற்பத்தி நிறுவனமாகத் தொடங்கிய சாம்சங், இன்று ஸ்மார்ட்போன், டேப்லட், செமி கண்டக்டர் என்று பல்வேறு தொழில்நுட்பங்களில் முன்னோடியாக விளங்குகிறது. அதற்காகத் தொலைகாட்சி போன்ற வீட்டு உபயோக மின்சாதன சந்தையை அப்படியே விட்டுவிடவில்லை, அதையும் விரிவுபடுத்திய படியேதான் உள்ளது.

உலகளவில் அலைபேசி விற்பனை எண்ணிக்கையில் தற்போது சாம்சங்தான் நம்பர் 1. இது போக வெளியில் பெரிதும் தெரியாத சாம்சங்கின் தொழில் - செமிகண்டக்டர் சிப் உற்பத்தி. போட்டியாளரான ஆப்பிள் நிறுவனம் கூட சாம்சங் சிப்புகளின் முதன்மையான வாடிக்கையாளர். சொல்லப்போனால் சிப் உற்பத்தியில் Intel நிறுவனத்தைக் கூடிய விரைவில் சாம்சங் பின்னுக்குத் தள்ளும் என்று கணிக்கப்படுகிறது.

2. ஆப்பிள், USA, 1976

சாகசக் கதைகள் மாதிரி ஸ்டீவ் ஜாப்ஸ் பற்றியும் ஆப்பிள் பற்றியும் நிறையக் கேட்டாகிவிட்டது. மேசைக் கணினிகள் தயாரிப்பின் மூலம் 1976-ல் தனது வரலாற்றைத் தொடங்கிய ஆப்பிள், மேக் லேப்டாப்கள் மூலம் இரண்டாயிரத்துக்குப் பிறகு மையத்திற்கு வந்தது. அதன்பிறகு ஒன்றன் பின் ஒன்றாக அது வெளியிட்ட சூப்பர் ஹிட் தயாரிப்புகள் தனி நபர் உபயோக மின் சாதனங்களுக்கான தர அளவுகோளாக மாறின. iPod, iPad, iPhone என்று அது சம்பாதிக்கும் பெரும் பணத்தை மறுபடி ரிசர்ச் மற்றும் டெவெலப்மன்ட்களில் செலவிட முடிவதால் அடுத்த சில ஆண்டுகளுக்கு இந்த ஏரியாவில் ஆப்பிளை அடிப்பது கடினம்தான்.

இப்படி அனைவரும் உபயோகிக்கும் மின் சாதனங்களை ஒரு புறம் மெருகேற்றியபடியே, அதை இயக்கும் இயங்குதளங்களையும் மென்பொருட்களையும் தொடர்ந்து மேம்படுத்தி வருகிறது ஆப்பிள். சூடான தொழில்நுட்பங்களான மேகக் கணிமை, பிக் டேட்டா போன்றவற்றிலும் நுழைந்துள்ள ஆப்பிள், வருங்காலத்தில் அத்துறைகளை எப்படி உபயோகப்படுத்தப் போகிறது என்பது ஆர்வமூட்டும் விஷயம்.

Foxconn (தைவான்), Hitachi (ஜப்பான்), Sony (ஜப்பான்) போன்ற நிறுவனங்கள் மின்னணு சாதனங்களின் கீழ் அடுத்த நிலைகளில் இருக்கின்றன.

ஹார்டுவேர்:

1. IBM, USA, 1911

மெயின்பிரேம், ATM, ஹார்டு டிஸ்க், RDBMS என்று பழம்பெரும் ஐபிஎம் கடந்த நூறாண்டுகளில் இந்த உலகிற்கு அளித்த தொழில்நுட்பங்கள் ஏராளம். பல்வேறு துறைகளில் கோலோச்சும் ஐபிஎம்மை ஹார்டுவேர் தலைப்பின் கீழ் குறிப்பிடுவது சற்று அநியாயம்தான். சில வருடங்களுக்கு முன்பு வரை லாப்டாப், சர்வர் என்று ஹார்டுவேரில் கவனம் செலுத்தி வந்த ஐபிஎம், இன்று மிகப்பெரும் சர்வீசஸ் நிறுவனமாக உருவெடுத்துள்ளது (சர்வீசஸ் பற்றி விரிவாகப் பின்னர் வருகிறது). இந்தப் பாதையில் ஐபிஎம் போவதற்கும் காரணமுண்டு. தடால் தடால் என்று மாறும் தொழில்நுட்பத்தில் பெரிதாக அடி வாங்குவது ஹார்டுவேர் நிறுவனங்களே. உதாரணமாக நேற்று வரை மேசைக்கணினி உற்பத்தியில் இருந்த நிறுவனங்கள் இன்று தொடு திரை கொண்ட டேப்லட் உற்பத்தியில் சுலபமாக இறங்கி விட முடியாது. புதிய கட்டமைப்பையே உருவாக்க வேண்டும்.

ஆனால் மென்பொருள் மற்றும் சர்வீசஸ் துறையினர் அப்படி மாறும் போக்குகளுக்கு ஏற்ப ஒப்பீட்டளவில் சேதாரமின்றி மாறிக்கொள்ளலாம். ஐபிஎம் தனது x86 சர்வர் தயாரிப்பை சீன நிறுவனமான லெனோவாவிடம் விற்றதற்கு அதுவும் ஒரு காரணம். இப்போது தனது வருவாயில் பாதிக்கும் மேல் தனது மென்பொருள் தயாரிப்புகள் மூலம் ஈட்டுகிறது ஐபிஎம் (Tivoli, Websphere போன்ற நிறைய ஐபிஎம் தயாரிப்புகள் 'நன்றாகப் போய்க்கொண்டிருக்கிறது'). மீதி பாதி வருமானம் சேவைகள் மூலம்.

வருங்காலத்தில் மேகக் கணிமை, பிக் டேட்டா (பார்க்க பெட்டி), மென்பொருள் மற்றும் ஐடி சேவைகள் ஆகியவற்றில் ஐபிஎம் கவனம் செலுத்தப்போகிறது. ஹார்டுவேரை பொறுத்தவரை மெயின்பிரேமை வழக்கம்போல் மேம்படுத்திக்கொண்டு, சேமிப்பக (Storage) தயாரிப்புகளிலும் அதிகக் கவனம் காட்டப்போகிறது.

மேகக் கணிமை (Cloud Computing) என்றால் என்ன? ஒரு உதாரணம் மூலமாகப் பார்க்கலாம். வீட்டுக்கு பதினைந்து விருந்தாளிகள் வருகிறார்கள். பிரியாணி செய்யலாம் என்று முடிவெடுக்கிறீர்கள். அனைத்து பொருட்களையும் அலைந்து வாங்கி, அளவு பார்த்து, சமைத்து, கடினமாக உழைத்தும் போதாமல் ஆகிவிட்டது. இதையே ஒரு உணவக வலைத்தளத்தில் நுழைந்து, பதினைந்து பிரியாணி என்று ஆர்டர் செய்தால், வீடு தேடி வந்து விடும். திடீரென்று அதிக விருந்தாளிகள் வந்தாலும் இந்த முறையில் எளிதில் சமாளிக்கலாம். இதில் பிரியாணிக்கு பதிலாக தொழில்நுட்ப சேவை, உணவகத்திற்குப் பதிலாக மேகக் கணிமை சேவை நிறுவனம் எனக் கொண்டால், அதுதான் மேகக் கணிமை. இதைப் புதிய தொழில்நுட்பம் என்று சொல்ல முடியாதென்றாலும், ஒரு புதிய சேவையளிக்கும் முறை எனச் சொல்லலாம். உங்கள் நிறுவனத்தின் ஒவ்வொரு கணினிக்கும் விலை கொடுத்து Word, Excel போன்ற மென்பொருளை வாங்காமல், இணையம் மூலம் Microsoft office 365 சேவையை கொண்டு தேவையான பொழுது மட்டும் அந்த மென்பொருளை உபயோகிக்கலாம். எவ்வளவு நேரம் உபயோகிக்கிறோமோ அவ்வளவு மட்டும் பணம் தந்தால் போதும். இந்தச் சேவையை இணையம் மூலமாகவே எளிதாக வாங்கமுடியும். நேற்று வரை நிறுவனங்கள் பெரும் எண்ணிக்கையில் சர்வர்களை வாங்கி, தாங்கள் உபயோகிக்கபோகும் தொழில்நுட்பங்களுக்காக ஒரு கட்டமைப்பை உருவாக்க வேண்டியிருந்தது. அதற்கு நேரமும், சமயங்களில் செலவும் கூடும். இனி இணையமும், பணமும் இருந்தால், நொடிகளில் தங்களுக்குத் தேவையான சேவைகளைப் பெற்றுக்கொள்ளலாம். தேவைப்படும் கட்டமைப்பை உருவாக்கி, எளிதாக இணையம் மூலம் துரிதமாகச் சேவைகளை வழங்குவது அந்தந்த மேகச்சேவை நிறுவனங்களின் வேலை. சாதாரண மின்னஞ்சல் சேவையில் தொடங்கி சக்தி வாய்ந்த டேட்டாபேஸ், சர்வர்கள், சேமிப்பகங்கள் என்று எதை வேண்டுமானாலும் மேகத்தில் இருந்து பெற்றுக்கொள்ளலாம்.

பிக் டேட்டா என்றால் என்ன? உலகம் முழுக்கத் தகவல்கள் குவிந்துகொண்டிருக்கிறது. இது வரை சேகரமாகியிருக்கும் மொத்த தகவல்களில் 90% கடந்த இரண்டு வருடங்களில் உற்பத்தியானவை எனும் செய்தியின் மூலம் எத்தனை வேகமாகத் தகவல்கள் சேர்ந்து கொண்டிருக்கின்றன என்பதைப் புரிந்து கொள்ள முடிகிறது. நமக்கே கூட 500GB ஹார்ட் டிஸ்க் வாங்கினால் இப்போதெல்லாம் போதவில்லை. Terabyte, Petabyte என்று சாதாரணமாகக் கேட்க முடிகிறது. இப்படிச் சிதறலாகக் குவியும் தகவல்களை இப்போது இருக்கும் தகவல் கையாளும் அமைப்புகளால் ஓரளவிற்கு மேல் சாதுர்யமாகக் கையாள முடியவில்லை. இந்த தேவையைப் பூர்த்தி செய்ய உருவாகி வந்ததே பிக் டேட்டா. உதாரணமாக CERN ஆராய்ச்சி மையத்தில் ஒரு நாளிலேயே 500 exabytes அளவில் தகவல்கள் குவிகின்றன. பல ஆயிரக்கணக்கான ஆராய்ச்சியாளர்கள், பல நாட்கள் உட்கார்ந்து ஆராய வேண்டிய வேலையைப் பிக் டேட்டா தொழில்நுட்பம் சில மணி நேரங்களில் செய்து முடிக்கக்கூடும். மருத்துவத்துறை, தொலைதொடர்பு, சில்லறை வர்த்தகம், ஆராய்ச்சி என்று பிக் டேட்டாவின் வளர்ச்சி பல துறைகளை மேலும் ஆற்றலுடன் செயல்பட உதவும். SMAC துறைகள்: இணையம் மற்றும் மொபைல் சாதனங்களின் ஊடுருவலாலும், தகவல்கள் பல மடங்கு வேகமாக குவிவதாலும் இப்போது வளர்ந்து வரும் தொழில்நுட்பங்களைக் கூட்டாக SMAC என்று அழைக்கிறார்கள். SMAC - சோஷியல் நெட்வொர்க்கிங், மொபிலிட்டி, அனலடிக்ஸ், கிளவுட் ஆகியவற்றின் சுருக்கம்.

Hewlett-Packard Company, USA, 1939:

HP லேப்டாப்புகளையும், பிரிண்டர்களையும் வாழ்வில் ஒரு முறையாவது கடந்திருப்போம். டேட்டாசெண்டர் ஹார்டுவேர், தனிநபர் கணினி சாதனங்கள் தயாரிப்பில் முன்னோடியான HP, இரண்டாயிரம் வாக்கில் காம்பேக் நிறுவனத்துடன் இணைந்ததும் மேசைக்கணினிகள் மற்றும் லேப்டாப் விற்பனையில் புதிய உத்வேகத்துடன் முன்னேறியது. அவற்றை அதிக விற்பனை செய்யும் நிறுவனங்களில் உலகிலேயே இரண்டாவது இடத்தில் இருக்கிறது. குறிப்பிட்ட துறையில் நுழைய புதிதாக முதலில் இருந்து உருவாக்க வேண்டியதில்லை, அதைச் செய்து கொண்டிருக்கும் ஒரு நிறுவனத்தை வாங்கிப்போட்டால் போதும் எனும் போக்கை கடைப்பிடித்து வருகிறது HP. IBM அளவிற்கு இல்லையென்றாலும் பல மென்பொருள் தயாரிப்புகளை கைவசம் வைத்துள்ளது. 

பெருங்கணினிகளான சர்வர் தயாரிப்பிலும் HP தான் தலைவர். 2008-ல் EDS நிறுவனத்தை வாங்கி சர்வீசஸ் துறையிலும் கால் பரப்பியது HP.

கையை மீறி வளர்ந்து நிற்கும் ஒரு நிறுவனம் எத்தகைய பிரச்சினைகளைச் சந்திக்கும் என்பதை HP சென்ற சில ஆண்டுகளில் காட்டியது. காகிதங்கள் குறைப்பால் பிரிண்டர் சந்தை பாதிப்பு, தொடுதிரை சாதனங்கள் வருகையால் குறையும் லேப்டாப் விற்பனை போன்ற பல பிரச்சினைகளைச் சந்திக்க வேண்டிய சூழ்நிலையில் இருக்கும் HP, தற்போது ஒரு மாறுதல் காலத்தைக் கடந்து கொண்டிருக்கிறது.

இணையம்:

அமேசான்.காம், USA, 1994:

இணைய நிறுவனங்களில் அமேசான், ebay போன்றவற்றை மின் வர்த்தகம் (e-commerce) என்கிற துணை தலைப்பின் கீழ் குறிக்கலாம். ஆன்லைனில் புத்தக விற்பனை என்கிற நோக்கோடு ஆரம்பித்த அமேசான்.காம், பிறகு மெல்ல மெல்ல கணினி, மின்னணு சாதனங்கள், இசை கோப்புகள், விளையாட்டுகள், மென்பொருள் என்று பலவற்றையும் விற்கிறது. வெளியாட்களையும் தங்களது கட்டமைப்பை உபயோகித்துப் பொருட்களை நேரடியாக விற்க அனுமதிக்கிறது. 2007 வாக்கில் அது வெளியிட்ட கிண்டில் மின் புத்தக ரீடர்கள் புத்தக விற்பனையில் ஒரு புரட்சியை ஏற்படுத்தியது.

அமேசானை பற்றி ஒரு சுவாரசிய தகவல்: வேறெந்த மின் வர்த்தக நிறுவனத்தை விடவும் பல மடங்கு அதிக வருவாய் ஈட்டும் அமேசான், பல ஆண்டுகளாகவே லாப அளவை மிகவும் குறைவாகவே வைத்துள்ளது. அமேசானின் மற்றொரு சிறப்பம்சம், 2002-இலேயே ஆரம்பிக்கப்பட்ட மேகக்கணிமை சேவையான Amazon Web Services (AWS). இன்று இந்தச் சேவையில் அமேசான் தான் மார்கெட் லீடர்.

கூகுள், USA, 1998:

தேடு இயந்திரத்தின் மூலம் இணையச் சந்தையை ஆக்கரமித்த கூகுளின் மற்ற தயாரிப்புகளான ஜிமெயில், கூகுள் பிளஸ், யூடியூப், பிளாக்கர் என்று அத்தனையும் சூப்பர் டூப்பர் ஹிட். அது போதாதென்று உலகில் இன்று பாதிக்கும் மேற்பட்ட ஸ்மார்ட்போன்/டேப்லட்களை இயக்குவது, கூகுளின் ஓப்பன் சோர்ஸ் முறையில் வெளியிடப்பட்ட ஆண்ட்ராய்ட் இயங்குதளம்தான்.

முன்னரே விவாதித்தது போல் பெரும் வளர்ச்சி காணவும், அதிகமாக ஊடுருவவும் ஆப்பிள், சாம்சங் போல் மின்னணு சாதனங்களைக் கையில் வைத்திருக்க வேண்டும் என்பதை உணர்ந்த கூகுள், மோடோரோலா நிறுவனத்தின் மொபைல் பிரிவை விலைக்கு வாங்கியது. ஆனால் இந்த ஆண்டில் அதை விற்கப்போவதாக அறிவித்த கூகுளின் திட்டம், மோடோரோலாவின் ஏராளமான காப்புரிமைகளைக் கைப்பற்றுவதே (அவற்றை மட்டும் விற்கவில்லை). அந்தத் தொழில்நுட்பங்களைக் கொண்டு ஆண்ட்ராய்டை பல மடங்கு மேம்படுத்த முடியும்.

கூகுளின் பல திட்டங்கள் டெக் உலகில் வெகு சுவாரசியமாக விவாதிக்கப்படுகிறது. வெளியில் தெரிந்த சில திட்டங்கள் என கூகுள் கிளாஸ், பொருட்களின் இணையம், தானியங்கி ரோபாட்கள்/கார்கள் போன்றவற்றைச் சொல்லலாம்.

இணையத்தில் மற்ற முன்னணி நிறுவனங்களாக ஃபேஸ்புக் (USA), டென்சென்ட் (சீனா) ஆகியவற்றை குறிப்பிடலாம்.

சாஃப்ட்வேர்:

தங்களது சாஃப்ட்வேர் தயாரிப்புகள் மூலம் வருமானம் ஈட்டும் நிறுவனங்கள்.

மைக்ரோசாஃப்ட், USA, 1975

விண்டோஸ் இயங்குதளம் எனும் ஏகபோகத்தைப் பல ஆண்டுகளாக அனுபவித்து வரும் பில் கேட்ஸ் ஆரம்பித்த மைக்ரோசாஃப்ட் நிறுவனம், சாஃப்ட்வேர் கொண்டு வருமானம் ஈட்டுவதில் முடிசூடிய மன்னனாக விளங்குகிறது. அது இவ்வளவு சக்தி வாய்ந்ததாக மாறியதற்கு வேர்டு, எக்ஸ்செல், அவுட்லுக் போன்றவை அடங்கிய மைக்ரோசாஃப்ட் ஆபிஸ் தயாரிப்புகளும் ஒரு முக்கியக் காரணம். தோன்றி வரும் அனைத்து தொழில்நுட்பங்களிலும் தனது தயாரிப்பை வெளியிட்டு விடும் மைக்ரோசாஃப்ட். அந்தத் தயாரிப்புகள் முதலில் கொஞ்சம் முன்பின் இருந்தாலும், போட்டியாளர்களின் தயாரிப்புகளைத் தொடர்ந்து கண்காணித்து அதன் நுட்பங்களைத் தங்களுடையதில் பொருத்தி முன்னுக்குக் கொண்டு வந்துவிடும். மென்பொருள் மட்டுமல்லாது Xbox போன்ற விளையாட்டுச் சாதனங்கள், சர்ஃபேஸ் டேப்லட்டுகள் என்று வன்பொருளிலும் ஆர்வம் செலுத்துகிறது. கூகுள் மோட்டோவை வாங்கியது போல், இதுவும் நோக்கியாவை வளைத்து போட்டது.

சமீபத்தில் இதன் தலைவராகப் பொறுப்பேற்றுள்ள இந்தியாவின் சத்யா நாதெல்லாவின் பேட்டிகள் மூலம், தயாரிப்பு நிறுவனமாக இருக்கும் மைக்ரோசாஃப்ட் வருங்காலத்தில் சேவை நிறுவனமாக மாறும் என்று கணிக்கப்படுகிறது. மேகக் கணிமையிலும் தொடர்ந்து கவனம் செலுத்துகிறது மைக்ரோசாஃப்ட். சுருக்கமாக, எந்தத் தொழில்நுட்பத்திலாவது பணம் வரும் என்று தெரிந்தால், அதில் மைக்ரோசாஃப்ட் இருக்கும்.

ஆரக்கள், USA, 1977:

அமேசான்.காம் முதல் யாஹூ வரை உலகின் மிகப்பெரிய பத்து வலைத்தளங்கள் உபயோகிப்பது ஆரக்கள் டேட்டாபேஸ். டேட்டாபேஸ் சந்தையில் தலைவராக விளங்கும் ஆரக்கள், தனக்கு வரும் வருவாயில் 13% ஆராய்ச்சி மற்றும் வளர்ச்சிக்காகச் செலவிடுகிறது. தொழிலாளர்கள், வாடிக்கையாளர்கள், சப்ளையர்கள் என்று ஒரு நிறுவனத்தின் முக்கியத் தரப்புகளைக் கையாளும் பிசினஸ் இன்டலிஜென்ஸ் தயாரிப்புகளிலும் முன்னணியில் இருக்கும் ஆரக்கள் குறி வைப்பது பெரிய நிறுவனங்களை.. ஜாவா போன்ற பல தொழில்நுட்பங்களை உருவாக்கிய சன் மைக்ரோசிஸ்டம்ஸ் நிறுவனத்தைச் சமீபத்தில் வாங்கியது ஆரக்கள். சன் கணினி சாதனங்களையும் தயாரிக்கும் நிறுவனமாகும்.

சாஃப்ட்வேரில் முன்னணியில் இருக்கும் பிற நிறுவனங்கள் SAP (ஜெர்மனி), Symantec, VMWare (USA) போன்றவை. 

மேற்கூறிய பகுப்புகள் அன்றி செமிகண்டக்டர் தயாரிப்பில் Intel, Qualcomm (USA) போன்ற நிறுவனங்கள் முன்னிலை வகிக்கின்றன. இங்கு பேசிய நிறுவனங்கள் அல்லாமல், வருவாய் குறைவாகவும் மிகவும் தரத்துடனும் இயங்கும் நிறுவனங்களும் நூற்றுக்கணக்கில் உள்ளன.

சர்வீசஸ் மற்றும் இந்திய ஐடி துறை:

சர்வீசஸ் எனப்படும் தொழில்நுட்ப சேவைப்பிரிவை கடைசியில் வைத்ததற்குக் காரணம், இந்திய நிறுவனங்களில் முக்கால்வாசி இந்தத் தலைப்பின் கீழ் வருபவை. இன்று இந்தியாவின் முன்னணி ஐடி நிறுவனங்கள் அத்தனையும் சேவை அளிக்கும் நிறுவனங்களே. சர்வீசஸ் என்பதை எப்படி விளக்கலாம்? மேலே பல மென்பொருள், கணினி சாதனங்கள் தயாரிப்பு (product) நிறுவனங்கள் பற்றிப் பார்த்தோம். அந்தத் தயாரிப்புகளை உபயோகித்து வாடிக்கையாளர்களின் தேவைக்கேற்ப மாற்றிக்கொடுத்து,  தொடர்ந்து அதைப் பராமரிப்பது இந்தச் சேவை நிறுவனங்களின் வேலை. சேவை நிறுவனங்களும் புதிய தயாரிப்புகளைத் தயாரிக்கும், ஆனால் அது ஒரு குறிப்பிட்ட வாடிக்கையாளருக்கான பிரத்யேக தயாரிப்பாக அமையும். மேலும் பிராஜக்ட் முடிந்ததும் அந்தத் தயாரிப்பு வாடிக்கையாளருக்குச் சொந்தமாகக் கூடும். இவற்றுடன் BPO, LPO போன்றவற்றையும் வசதிக்காக இந்தத் தலைப்பின் கீழ் சேர்த்துக்கொள்ளலாம்.

சுருக்கமாக, சேவை நிறுவனங்கள் தங்களின் வாடிக்கையாளர்களுக்கு விற்பது ஆட்களின் திறமையையும், நேரத்தையும். இதனால் பொதுவாகச் சேவை நிறுவனத்தில் ஆட்களின் எண்ணிக்கை அதிகமாக இருக்கும் (இதை வேறு மாதிரியும் பார்க்கலாம். பெரும்பாலும் நிறைய ஆட்கள்/நேரம் தேவைப்படும் வேலைகளை, திரும்பத்திரும்ப செய்ய வேண்டிய வேலைகளை மட்டுமே அவுட்சோர்சிங், ஆப்ஷோரிங் மூலம் தள்ளிவிடப்பட்டன. ஆனால் அந்த வாய்ப்பை பயன்படுத்திக்கொண்டு இப்போது நமது நிறுவனங்கள் வெகு தூரம் வந்துவிட்டன என்றே சொல்லவேண்டும். போக வேண்டிய தூரமும் அதிகம்).

இந்த நிறுவனங்கள் அளிக்கும் சேவை என்பது தொழில்நுட்பம் கொண்டு ஒரு வாடிக்கையாளரின் செலவை குறைத்து, செயல்படு திறனை அதிகரிக்கும் சேவையாக இருக்கலாம்; புதிய மென்பொருளை வாடிக்கையாளருக்கு உருவாக்குவதாக இருக்கலாம். ஏற்கனவே ஓடிக்கொண்டிருக்கும் மென்பொருளை பராமரிப்பு மட்டும் செய்வதாக இருக்கலாம். புதிய தொழில்நுட்ப கட்டமைப்பை உருவாக்குவதாக, எளிமைப்படுத்துவதாக, மேம்படுத்துவதாக, பராமரிப்பதாக இருக்கலாம். ஏற்கனவே மேலே பேசிய சில நிறுவனங்களைத் தவிர்த்து இந்தப் பகுப்பின் கீழ் முன்னணியில் இருக்கும் நிறுவனங்களாக, Fujitsu, Accenture, NTT, Capgemini, CSC ஆகியவற்றைக் குறிப்பிடலாம். இதில் ஒவ்வொருவருக்கும் ஒரு சிறப்பியல்பு, ஒரு குறிப்பிட்ட தொழில்நுட்பத்தில்/துறையில் சிறப்புக் கவனம் போன்றவை உண்டு.

முதன்மையான பத்து சர்வீசஸ் நிறுவனங்கள் பட்டியலில் சென்ற ஆண்டு முதல் முறையாக இந்திய நிறுவனமான TCS இடம் பிடித்துள்ளது. கிட்டத்தட்ட 42% மென்பொருள் தயாரிப்பு மற்றும் பராமரிப்பிலும், 12% தொழில்நுட்ப கட்டமைப்பு சேவைகள் (Infrastructure services) மூலமும் வருவாய் ஈட்டுகிறது. இந்திய அளவில் முதல் ஐந்து இடங்களில் இருக்கும் பிற நிறுவனங்கள்: Cognizant, Infosys, Wipro மற்றும் HCL. இன்னும் சில வருடங்கள் கழித்து சர்வீசஸில் முதல் பத்து இடங்களில் இவர்களும் இருக்கக்கூடும். இந்த புள்ளிவிவரத்தில் இருந்து இந்திய ஐடி நிறுவனங்கள் அடைய வேண்டியது இன்னும் எவ்வளவோ இருக்கிறது என்பது புரிகிறது.

இந்திய ஐடி துறையும் 2007 வாக்கில் வந்த உலகளாவிய பொருளாதார மந்தநிலைக்கு முன் பாலாறும் தேனாறும் ஓடிய துறைதான். ஆனால் மந்தநிலை (Recession) காரணமாக இப்போது தன்னையே பெரும் மாறுதல்களுக்கு உள்ளாக்கிக்கொண்டுள்ளது. ஐடி துறை செழிப்பாக வளர, மற்ற துறைகள் நல்ல லாபத்துடன் இயங்க வேண்டும். அப்போதுதான் இவர்கள் அளிக்கும் சேவை, மென்பொருள், சாதனங்கள் போன்றவற்றைப் பணத்தைப் போட்டு மற்ற துறையினர் வாங்குவார்கள். மந்தநிலை காரணமாக அனைத்து நிறுவனங்களும் தங்களது ஐடி தேவைகளுக்கான பட்ஜெட்டை குறைக்க, அதனால் ஐடிக்கு வருவாய் குறைய, ஆட்களைக் குறைக்க என்று சங்கிலியாய் சம்பவங்கள் அரங்கேறின. ஆனால் இப்போது கொஞ்சம் கொஞ்சமாக நிலைமை சீரடைவதாகச் சொல்லப்பட்டாலும், படுக்கை போர்வையை உதறி விரித்தது மாதிரி மாறுதல்கள் ஏற்பட்டுவிட்டன. இது மந்தநிலையினால் வந்த மாற்றமா, தொழில்நுட்பத்தின் அசுர பாய்ச்சலினால் ஏற்படும் மாற்றமா, அல்லது ஆட்கள் குறைவாக வைத்தே பணம் பண்ணும் போக்கை நிறுவனங்கள் கைவரப்பெற்று விட்டதாலா என்பது விவாதிக்கப்பட வேண்டியது. 

இவை அல்லாமல் புதிய சிக்கல்களாக உள்ளூரில் தான் வியாபாரம் செய்ய வேண்டும் என்று பல்வேறு நாடுகளின் கட்டுப்பாடுகள், இந்தியாவைப் போலவே மலிவு விலையில் சேவை வழங்கும் நாடுகளின் வளர்ச்சி, ரூபாய் மதிப்பின் ஊசலாட்டம், ஊழியர்களின் சம்பளம் உட்பட உயரும் செலவுகள் ஆகியவை இந்திய நிறுவனங்கள் சந்திக்கும் சவால்கள்.

கடந்த சில ஆண்டுகளாகவே ஐடியில் ஆட்களை, குறிப்பாகப் புதியவர்களை, குறைவாக வேலைக்கு எடுப்பதைப் பார்க்க முடிகிறது. வளர்ச்சி ஓரளவிற்குச் சீரடைந்தும், ஆட்கள் குறைவாக எடுக்கப்படுவதற்குச் சில பல காரணங்கள் சொல்லப்படுகிறது. முன்பு போல் ஆட்களுக்கு அல்லாமல் அளிக்கப்படும் சேவைக்கே பணம் என்னும் தேவை பெருகுவதால், வருவாய்க்கு சமமான வேலைவாய்ப்பு வளர்ச்சி இருக்காது. உலக நிறுவனங்கள் பெரியளவில் தொழில்நுட்பத்தில் முதலீடு செய்யத்தயாராக இருந்த காலத்தில், சேவை நிறுவனங்களும் ஆயிரக்கணக்கான பட்டதாரிகளை வளாகத்தேர்வு மூலம் எடுத்து பெஞ்சில் வைத்துக்கொண்டு, புதிய பிராஜக்ட்கள் வந்ததும் அவர்களை உபயோகப்படுத்திக் கொண்டன. இப்போது பிராஜக்ட் கிடைப்பதே நிச்சயமில்லை என்பதால் தேவைப்படும்போது மட்டும் ஆஃப் காம்பஸ் முறையில் புதியவர்களை எடுத்துக்கொள்ளும் போக்கு வளர்ந்து வருகிறது. மேலும் ஆட்கள் செய்த வேலையைத் தன்னிச்சையாகச் செய்யும் நிரலிகள், பெருகி வரும் அனுபவசாலிகள், சில்லறை வேலைகளைச் செய்வதற்குப் பதில் உயர் தொழில்நுட்பங்களில் கவனம் ஆகியவையும் புதியவர்களைக் குறைவாக எடுப்பதற்குக் காரணமாகச் சொல்லப்படுகிறது. வெளியேறும் பட்டதாரிகளில் குறைவானவர்களே வேலைக்குத் தகுதி வாய்ந்தவர்கள் எனும் ஆய்வும் பயமுறுத்துகிறது.

இத்தனை ஆண்டுகளில் மொத்தமாக முப்பது லட்சம் பேருக்கு நேரடியாக வேலை வாய்ப்பு அளித்திருக்கிறது இந்திய ஐடி துறை. ஆனால் வெளிவரும் பட்டதாரிகளோ ஒரு ஆண்டுக்கே பத்து லட்சத்திற்கும் மேல். ஆகவே ஐடியை மட்டுமே நம்பாமல் பல்வேறு துறைகளை வளர்த்து தேவைக்கேற்ப அவர்களை வேலைக்கு அமர்த்துவதே சமச்சீர் வளர்ச்சியாக அமையும். இது ஒரு புறமிருக்க அதிக சம்பளம் வாங்கும் அனுபவஸ்தர்களின் தலைக்கு மேலும் எந்நேரமும் கத்தி தொங்கிக்கொண்டுதான் இருக்கிறது.

வருங்காலம் எப்படி இருக்கும்?

தொழில்நுட்ப மாறுதல்கள் அல்லாமல் வாடிக்கையாளர்களின் எதிர்பார்ப்பும் மாறிக்கொண்டே வருகிறது. குறைவான விலை, வேகமான சேவைகள், பல்வேறு தேவைகளைத் திரளாகப் பூர்த்திச் செய்தல், புதுமைகள் ஆகியவை கட்டாயமாக்கப்பட்டுள்ளது. SMAC, பொருட்களின் இணையம், மேகக்கணிமை, மென்பொருளால் வரையறுக்கப்பட்ட டேட்டாசெண்டர் ஆகிய பிரிவுகளில் ஏராளமான தொழில்நுட்ப வாய்ப்புகள் பெருகி வருகின்றன. இந்தியாவிலும் சர்வீசஸ் மட்டுமின்றி தயாரிப்பு நிறுவனங்களும் பெருமளவு வளர வேண்டும்.

மென்பொருளால் வரையறுக்கப்பட்ட டேட்டாசென்டர் பெருநிறுவனங்கள் தங்களின் தொழில்நுட்ப தேவைகளுக்கான சர்வர்கள், நெட்வொர்க்/சேமிப்பாக உபகரணங்கள் போன்றவற்றை மிகவும் பாதுகாப்பாக வைத்திருக்கும் இடம் டேட்டாசென்டர் (உலகம் முழுக்க பயனர்களுக்கு சேவை வழங்கும் கூகுளின் டேட்டாசென்டரை இணையத்தில் பார்க்கமுடியும்). ஒவ்வொரு சர்வருக்கும் தனித்தனியாக ஹார்டுவேர் வாங்காமல், ஒரே மெஷினில் பல வர்ச்சுவல் சர்வர்களை இயக்கும் சர்வர் virtualization தொழில்நுட்பம் மிகப்பெரும் வெற்றி அடைந்தது. பிறகு சேமிப்பகம், நெட்வொர்க் என ஒரு டேட்டாசென்டரில் இருக்கும் முக்கிய ஹார்டுவேர் சாதனங்கள் அனைத்தையுமே வர்ச்சுவலைஸ் செய்வதை Software defined datacenter என்கிறார்கள். மேகம் மூலம் துரிதமாக சேவைகள் அளிக்க இந்த மாற்றம் அவசியம்.

அமெரிக்க, ஐரோப்பிய நிறுவனங்களை மட்டும் நம்பி, அங்கு ஏதாவது பிரச்சினை என்றால் கையைப் பிசைந்து கொண்டிராமல், வேறொரு முக்கியச் சந்தையைக் கவனிப்பதன் மூலம் இந்திய ஐடி நிறுவனங்கள் பெருவளர்ச்சி காணமுடியும். அது நமது இந்திய சந்தை. மருத்துவம், கல்வி, வங்கிகள், காப்பீட்டு நிறுவனங்கள், அரசு மற்றும் இந்திய பெருநிறுவனங்கள் தொழில்நுட்பத்தில் செய்யப்போகும் முதலீடுகள் ஐடி துறைக்கு நம்பிக்கை அளிப்பதாக உள்ளது. மேலும் மேகச்சேவை மூலம் சிறு நிறுவனங்களும் தங்களைச் சுலபமாகத் தொழில்நுட்ப மயமாக்கிக் கொள்ள முடியும். உலக அளவிலும் மெதுவாக மந்தநிலை மறைந்து நிறுவனங்கள் தொழில்நுட்பத்தில் பெருமளவு முதலீடு செய்யத்துவங்கும் என்று எதிர்பார்க்கப்படுகிறது. 

உலகம் தொடர்ந்து டிஜிட்டல் மயமாக மாறிவரும் வேளையில், தொழில்நுட்ப நிறுவனங்களின் தேவை மேலும் அதிகரிக்கவே செய்யும். பழைய தொழில்நுட்பங்கள் மறைய மறைய புதிய தொழில்நுட்பங்களில் வாய்ப்புகள் பெருகியபடியே இருக்கும். ஆனால் 2007 ஆம் ஆண்டுக்கு முன்புவரை இந்திய நிறுவனங்கள் கண்ட வளர்ச்சி அளவிற்கு இனி காண முடியுமா என்பது சந்தேகமே.

மாற்றம் ஒன்றே மாறாதது என்பது ஐடி துறைக்காகவே எழுதப்பட்ட வாசகமோ என்று தோன்றுகிறது. அதில் இருப்பவர்களும் தொடர்ந்து தங்களைப் புதுப்பித்துக்கொண்டே இருப்பதைத் தவிர வேறு வழியில்லை.

(ஆழம் ஜூலை இதழில் வந்த கட்டுரையின் முழு வடிவம்)

முழுதும் படிக்க..

பிட்காயின் – பரிணாமமா, பரிநாமமா?

ஆழம் இதழில் வெளிவந்த பிட்காயின் பற்றிய அறிமுகக்கட்டுரை.. அங்கு செல்ல
(சுருக்கப்படாத வடிவம் கீழே)

அஸ்ஸாமில் கிட்டத்தட்ட அறுநூறு ஆண்டுகளாக பண்டமாற்று முறையில் நடைபெறும் ஒரு சந்தையும், அதை தக்கவைத்திருக்கும் பழங்குடிகளையும் பற்றிய செய்தி நிஜமாகவே ஆச்சர்யத்தை ஏற்படுத்தியது.பணம் என்கிற வஸ்து தோன்றுவதற்கு முன் இருந்த நடைமுறை! தானியங்கள், கால்நடைகள், உலோகங்கள் என்று பண்டமாற்றிக்கொண்டு வளர்ந்த பொருளாதாரத்தில், பணம் என்கிற விஷயம் கண்டுபிடிக்கப்பட்டதும் மாற்றுமுறை ஒரு ஸ்திரத்தன்மையை அடைந்தது. பல நூற்றாண்டுகளாக மாறாமல் பணமே நிலையாக தொடர்கிறது. ஆனால் இன்று தொழில்நுட்பத்தினால் மாபெரும் மாற்றங்களை சந்தித்து கொண்டிருக்கும் மனிதகுலம், பணத்திலும் சந்திக்கப்போகிறது. ஆம். பணத்தின் தொழில்நுட்ப பரிணாமம் பிட்காயினை வரவேற்க தயாராகிக்கொள்ளுங்கள்.

தற்போதைய சிக்கல்கள்
இணைய உலகிற்கான நாணயம் என்று பிட்காயினை சொல்லலாம். ஏன், நான்தான் ஏற்கனவே ஆன்லைனில் பொருட்களை சுலபமாக வாங்குகிறேனே என்று ஒருவர் கேட்கக்கூடும். அதனால் இப்போது இருக்கும் முறையில் உள்ள குறைபாடுகளையும், பிட்காயின் அவற்றில் எதைக் களைய முயல்கிறது என்பதையும் முதலில் பார்க்கலாம்.

இப்போது நாம் செய்யும் ஆன்லைன் கொடுக்கல் வாங்கல் அனைத்துமே ரூபாய் அல்லது வேறு கரன்சி கொண்டே செய்கிறோம். ரூபாயை கட்டுப்படுத்துவது ரிசர்வ் வங்கி. மேலும் அந்த சேவையை பெற விற்பவர், வாங்குபவர் இருவருமே ஒரு குறிப்பிட்ட தொகையை கணக்கு வைத்திருக்கும் வங்கிக்கும், மாஸ்டர் கார்ட், விசா போன்ற நிறுவனங்களுக்கும் செலுத்தவேண்டியிருக்கும் (இவர்களுக்கு கட்டவேண்டிய தொகை முக்கியமாக அவர்கள் செய்யும் மத்தியஸ்தம் மற்றும் பிரச்சினை வரும்போது சரிசெய்வதற்காகவே).

அதுமட்டுமில்லாமல், ஒரு குறிப்பிட்ட தொகைக்கு மேல் இருக்கவேண்டும் போன்ற வரம்புகளையும் இந்த நிறுவனங்கள் விதிக்கக்கூடும். இன்னொரு முக்கியமான விஷயம், இந்த முறையில் வாங்குபவர், விற்பவர் ஆகிய தகவல்களின் அப்பட்டமான தன்மை. உதாரணமாக, ஒருவர் போர்னோ வகை படத்தை வாங்க விரும்புகிறார். ஆனால் அவரின் கணக்கில் வாங்கினால் சுலபமாக, அவர் வருங்காலத்தில் டெல்லி முதலமைச்சர் ஆகும் சமயத்தில், இவர் ஒரு காலத்தில் ‘அபச்சாரமான படத்தை’ அவர் கணக்கில் வாங்கியிருக்கிறார் என்று கண்டுபிடித்து பெயரை ரிப்பேர் செய்ய முடியும்.

ஆக, இப்போதைய முறையில் இருக்கும் கெடுபிடிகள் - பணத்தை கட்டுப்படுத்தும் (அதன் மதிப்பை மாற்றக்கூடிய) ஒரு மத்திய வங்கி அல்லது அரசு, சேவைதாரர்களுக்கு கட்டவேண்டிய தொகை, உச்ச வரம்புகள், வாங்குபவர்/விற்பவர் பற்றிய வெளிப்படை தகவல்கள் போன்றவற்றை களைய முற்படுகிறது பிட்காயின். இது எப்படி நடக்கும்? அதுவும் ஒரு மத்திய கட்டுப்பாட்டகமின்றி பொருளாதார அமைப்பு எப்படி சாத்தியம்?

பிட்காயின்
2009 இல் மறையீட்டியல் (க்ரிப்டோக்ரபி) துறையில் சடோஷி நகமொடோ என்பவர் தாக்கல் செய்த பேப்பரில் பிட்காயினின் அடிப்படை பற்றியும் அதை நடைமுறை படுத்த ஒரு மாதிரி மென்பொருளையும் ஓப்பன் சோர்ஸ் முறையில் வெளியிட்டார். (இதில் அந்த சடோஷி பற்றிய தகவல்கள் சுவாரசியமான தனிக்கதை. அவர் தனியாளா, பலர் சேர்ந்த குழுவா, யார் அவர்(கள்) போன்றவை இன்று வரை ரகசியமாக இருக்கிறது).

முழுக்க முழுக்க பிட்காயின் நெட்வொர்க்கில் இணைந்திருப்பவர்கள் அவர்களாகவே பணத்தை புதிதாக உருவாக்கி, பரிமாற்றங்கள் செய்து, நடக்கும் பரிமாற்றங்களை சரிபார்த்து இயங்கும் ஒரு அமைப்பே பிட்காயின். இங்கு உருவாக்கப்படும் நாணயம் முழுக்க முழுக்க வெர்ச்சுவல் உலகிற்கானது. மற்ற கரன்சிகள் மாதிரி அச்சடிக்கப்படாது.
அப்படி வெளியிடப்பட்ட ஒரு கருதுகோள் பலரையும் ஈர்க்க, கடந்த சில ஆண்டுகளிலேயே மளமளவென்று வளர்ந்துவிட்டது பிட்காயின்.

புதிதாக அதற்குள் ஒருவர் நுழைய என்னென்ன தேவை? வாலெட் (Wallet - பணப்பை) எனப்படும் மென்பொருள் அல்லது செயலியை கணினியிலோ, மொபைலிலோ நிறுவி விட்டால் போதும். அது உங்களுக்கு ஒரு முகவரியை கொடுத்துவிடும். அதன் மூலம் வேண்டிய பொருட்களை பிட்காயின்கள் கொண்டு வாங்கிக்கொள்ளலாம், விற்கலாம்.

பிட்காயினுக்கு போய் யார் பொருளை விற்பார்கள் என்று நினைப்பவர்களுக்கு – ஏகோபித்த ஆதரவு இல்லையென்றாலும் அப்படி பொருட்கள் விற்பவர்களின் பட்டியல் வேகமாக வளர்ந்துவருகிறது. இப்போதைக்கு நன்கு தெரிந்த நிறுவனங்கள் என்றால் வேர்டுபிரஸ், ரெட்டிட் போன்றவை பிட்காயின்களை ஒப்புக்கொள்கின்றன.

பிட்காயின்களை அனுப்புவது வெகு சுலபம். வேலட்டை திறந்து, யாருக்கு அனுப்புகிறீர்களோ அவர்களின் முகவரி, எவ்வளவு பிட்காயின் என்று கொடுத்து அனுப்பு என்று அழுத்தினால் முடிந்தது. சரி பிட்காயின்கள் கொடுத்து எதையாவது வாங்கலாம் என்று முடிவெடுத்துவிட்டீர்கள். ஆனால், அவர்களுக்கு கொடுக்க முதலில் உங்களிடம் பிட்காயின்கள் வேண்டுமே? அதை எப்படி பெறுவது?

மூன்று வகைகளில் பெறலாம். பங்குச்சந்தைகளில் பணம் கொடுத்து பங்குகள் வாங்குவது போல், பிட்காயின் எக்ஸ்சேஞ்சுகளில் வாங்கிக்கொள்ளலாம். இரண்டாவது முறை பொருட்களை விற்று பணத்திற்கு பதிலாக பிட்காயின்கள் பெற்றுக்கொள்வது. மூன்றாவது மைனிங் மூலம்.

மைனிங்கும் சில அடிப்படைகளும்
எப்படி கனிமங்களை சுரங்கங்களில் வெட்டி எடுக்கிறார்களோ, அது மாதிரி பிட்காயின்களை எடுக்க சற்று உழைக்கவேண்டும். ஆனால் உண்மையான தொழிலாளிகள் ஆபத்தான சூழல்களில் வேலை செய்வது போல் அல்ல. ஏசி அறையில் அமர்ந்து கொண்டு கூட செய்யலாம், அதாவது மெஷின் வேலை செய்வதை வேடிக்கை பார்க்கலாம். இங்குதான் பிட்காயினின் அடிப்படையை பார்க்கவேண்டியுள்ளது. ஒரு சின்ன எடுத்துக்காட்டு மூலம் இதை பார்க்கலாம்.

*      கவுண்டமணி செந்திலிடம் ஒரு வாழைப்பழம் வாங்க வேண்டும். அதன் மதிப்பு ஐந்து பிட்காயின்கள் என்று வைத்துக்கொள்வோம். இருவருமே பிட்காயின் வேலட் நிறுவி, ஒரு முகவரியும் வைத்திருக்கிறார்கள்.

*      ஒவ்வொரு முகவரிக்கும் பொது, தனி என்று இரண்டு சாவிகள் (Keys) உருவாக்கப்படும். இதில் பொதுச்சாவியை அனைவரிடமும் பகிர்ந்து கொள்ளலாம். தனிச்சாவி நமக்கே நமக்கானது. இப்படி நினைவில் வைத்துக்கொள்வோம் - தனிச்சாவி என்பது கைநாட்டு; அது கவுண்டமணியின் கைநாட்டுதான் என்று செந்தில் சரிபார்க்கும் உபாயம்தான் பொதுச்சாவி.

*      கவுண்டமணி செந்திலின் முகவரிக்கு ஐந்து பிட்காயின்கள் அனுப்புகிறார். அப்படி அனுப்புகையில் தனிச்சாவி மூலம் கவுண்டமணியின் கைநாட்டு வைக்கப்பட்டு விடும். பிறகு நான் அனுப்பவில்லை, இவ்வளவுதான் அனுப்பினேன் என்றெல்லாம் மாற்றி பேச முடியாது. செந்தில் தன்னிடம் பகிரப்பட்டிருக்கும் பொதுச்சாவி மூலம் இதை அனுப்பியது கவுண்டமணிதான் என்று உறுதிப்படுத்திக் கொள்வார். அதாவது அவர்கள் வைத்திருக்கும் மென்பொருள் இது அத்தனையையும் செய்துவிடும்.

*      இந்த பரிவர்த்தனையில் கவுண்டமணியிடம் ஐந்து பிட்காயின்கள் கழிக்கப்பட்டு, செந்திலிடம் கூட்டப்படும். ஆனால் தனியாட்களின் வரவு செலவை பிட்காயின் சேமிப்பதில்லை. அப்படியென்றால் கவுண்டமணியிடம் ஐந்து காயின்கள் இருந்தது என்பது எல்லாருக்கும் எப்படி தெரியும்? இதுவரை பிட்காயினில் நடந்த அத்தனை பரிவர்த்தனைகளும் சோதிக்கப்பட்டு இவரிடம் ஐந்து காயின்கள் வந்து சேர்ந்தது ஊர்ஜிதப்படுத்தப்படும். இதற்காக இதுவரை நடந்த அத்தனை பரிமாற்றங்களும் சேமித்து வைக்க வேண்டிய தேவை எழுகிறது.

*      அதுதான் பிளாக் செயின் என்கிற மாபெரும் பொதுப்பதிவேடு. பிட்காயினில் இணைந்திருக்கும் அனைவரிடமும் இதன் நகல் இருக்கும். இந்த பதிவேட்டில் உலகம் முழுக்க நடக்கும் அத்தனை பிட்காயின் கொடுக்கல் வாங்கலும், ஆதி பிட்காயின் உருவானது முதல், பதிக்கப்பட்டிருக்கும்.இந்த பதிவேடுதான் பிட்காயினுக்கு அடிப்படை. இதை வைத்து எந்த முகவரியில் யார் என்ன செய்தார்கள் என்று யார்வேண்டுமானாலும் பார்க்க முடியும் என்பதாலேயே, ஒவ்வொரு முறையும் நமது முகவரியை மாற்றிக்கொள்ள அறிவுறுத்தப்படுகிறது.

*      கவுண்டமணி-செந்தில் பரிவர்த்தனை உடனே நடந்தாலும், அதை உறுதிப்படுத்த பத்து நிமிடங்கள் வரை ஆகலாம். ஏன் பத்து நிமிடங்கள்? மேலே சொன்ன முறைகளில் யார் எவ்வளவு அனுப்பினார்கள் என்பதை ஊர்ஜிதப்படுத்தவும், அதிகமாக செலவழிப்பதை தடுக்க பிளாக் செயின் இருப்பதையும் பார்த்தோம். ஆனால் கடைசியாக செய்யப்பட்ட பரிவர்த்தனை சரியென்று அனைவராலும் ஊர்ஜிதப்படுத்தப்பட்டு பிளாக் செயின் சங்கிலியின் கடைசி இணைப்பாக ஒப்புக்கொள்ளப்பட வேண்டும். இல்லையென்றால் கவுண்டமணி செந்திலிடம் ஐந்து பிட்காயின்கள் கொடுத்து வாங்கிவிட்டு, அந்த தகவல் வடிவேலுவைச் சேருமுன், வடிவேலுவிடமும் அதே ஐந்து பிட்காயின்களை உபயோகப்படுத்தி விடுவார்.

*      இங்கு தான் மைனர்ஸ் - சுரங்கத்தொழிலாளிகள் வருகிறார்கள். இவர்களின் வேலை கவுண்டமணியும் செந்திலும் செய்த பரிவர்த்தனை எந்தவித தவறுகளும், பித்தலாட்டமும் இன்றி சரியாக நடந்ததா என்று ஊர்ஜிதம் செய்து, ஏற்கனவே ஊர்ஜிதமாகி இருக்கும் முந்தைய பரிவர்த்தனைகளுடன் இணைப்பது.

*      ஆனால் ஒவ்வொன்றையும் தனித்தனியாக பார்க்காமல் புதிதாக நடந்த, ஆனால் சரிபார்க்கப்படாத சில பரிவர்த்தனைகளை ஒரு கற்றையாக (பிளாக்) எடுத்துக்கொள்கிறார்கள். ஒரே நேரத்தில் உலகம் முழுக்க பலர் இந்த பிளாக்கை உருவாக்க முனைவார்கள். இதில் யாருடைய பிளாக் தேர்ந்தெடுக்கப்பட வேண்டும் என்பதை தீர்மானிக்க கணிதப் புதிர் ஒன்று முன்வைக்கப்படும். அதை யார் முதலில் ஊகிக்கிறார்களோ, அவர்களின் பிளாக் ஒப்புக்கொள்ளப்படும். இந்த சிக்கலான புதிரை அளவுகோளாக வைப்பதன் மூலம் பிட்காயின் நெட்வொர்க்கால் சீராகவும் தவறில்லாமலும் இயங்க முடிகிறது. கவுண்டமணியாலும் ஏமாற்றமுடியாது. இந்த வேலையை செய்ததற்கு கூலியாக தொழிலாளிகளுக்கு இருபத்தைந்து பிட்காயின்கள் வழங்கப்படும்.

*      இந்த சுரங்க வேலையை, அதாவது சரிபார்த்தலை, யார் வேண்டுமானாலும் செய்ய முடியாது. அது ஒரு சிக்கலான புதிர். ஒரு நொடியில் பல ஊகங்களை கொடுத்தாலொழிய உங்களின் விடை முதலில் ஒப்புக்கொள்ளப்பட வாய்ப்புகள் மிகக்குறைவு. அதைச்செய்ய கருவிகள் உண்டு (சக்திவாய்ந்த பிரத்யேக கணினிகள் என்று வைத்துக்கொள்வோம்)– அவை சந்தையில் பலவாரியாக விற்பனைக்கு கிடைக்கிறது. லட்சங்களில் கூட உண்டு. சில லட்சங்களை பிட்காயினில் முதலீடு செய்துள்ள IIT மாணவர்களை பற்றிய செய்திகளும் படிக்க கிடைக்கிறது.

*      இவ்வளவு பணம் கொட்டி வாங்கியும் தனியாளாக அந்தப் புதிரை கணிப்பது முடியாத காரியம். எனவே பலர் கூட்டாக இணைந்து இந்த ஊகங்களை செய்கின்றனர். இதற்காகவே BTCGuild, deepbit போன்ற குழுக்கள் இயங்குகின்றன, அவற்றில் பதிந்து கொண்டு உங்கள் கணினியையும் இணைத்துவிட வேண்டியது. ஒவ்வொரு முதல் கணிப்புக்கும் வரும் 25 பிட்காயின்களை அவர்களுக்குள் பிரித்துக்கொள்கிறார்கள்.

*      இப்படி உருவாக்கப்படும் பிளாக் செயின் அதி பாதுகாப்பாக இருக்கிறது. அதில் எங்கு நடந்த பரிமாற்றத்தையும் யாரும் மாற்ற முடியாது. எங்காவது ஒரு இடத்தில் கை வைத்தால் கூட அதற்கு பின் பிளாக் செயினில் உள்ள அத்தனையும் காலாவதியாகிறது. மேலும் தனி ஒருவரால் இந்த புதிர்களை தீர்ப்பது, தொடர்ந்து பிளாக்குகளை உருவாக்குவது போன்றவற்றை செய்யவே முடியாது. அதனால் யாராலும் இதை கட்டுப்படுத்தவும் முடியாது.

*      உண்மையில் மைனிங்கில் ஈடுபடுபர்களுக்கு இந்த சமாச்சாரங்கள் தெரிய வேண்டிய அவசியமில்லை. கணக்கு தொடங்கு, புதிர் தீர்க்க கருவியை வாங்கிப்போடு என்று இருந்தால் போதும். மிச்ச வேலைகளை கணினியே பார்த்துக்கொள்ளும்.

*      சரிபார்க்க ஆகும் பத்து நிமிடங்கள் என்பது இப்போதைக்கு இருக்கும் பிட்காயின் நெட்வொர்க்கின் சிக்கல் அளவுதான். நாளாக நாளாக இந்த சிக்கலின் அளவு அதிகரிக்கப்பட்டு கணிதப்புதிருக்கு விடை காண கூடுதல் நேரம் பிடிக்கும் – அதாவது புதிய பிட்காயின்கள் உருவாக்கப்படுவது மட்டுப்படும். மேலும் இன்று இருபத்தைந்து பிட்காயின்களாக இருக்கும் கூலி நான்கு வருடங்களுக்கு ஒருமுறை பாதியாக குறைக்கப்படும் (பிட்காயின் தொடக்கத்தில் கூலி ஐம்பது காயின்களாக இருந்தது)

*      இப்படி புதிதாக கிடைக்கும் பிட்காயின்களின் வேகத்தை மட்டுப்படுத்துவதன் மூலம் அதன் மதிப்பு அதிகரிக்கிறது. எப்படி அலுமினியம் சொற்பமாக கிடைத்த ஒரு காலத்தில் தங்கத்தை விட அது விலை அதிகமாக இருந்ததோ அது மாதிரி!

*      ஆனால் இப்படி உருவாக்கிக்கொண்டே போனால், நாளடைவில் எல்லாரும் ஆயிரக்கணக்கில், லட்சக்கணக்கில் பிட்காயின்கள் சேகரித்து விடுவார்களே? அதற்குதான் பிட்காயின் ஆரம்பிக்கப்பட்ட போதே மொத்தமாக 2.1 கோடி பிட்காயின்கள் மட்டுமே உருவாக்கப்படும் என்று நிர்ணயிக்கப்பட்டது. இது போதுமா என்பவர்களுக்கு, நாம் பைசா என்று சொல்வது போல் பிட்காயினில் சடோஷி என்று சொல்கிறார்கள். அதன் மதிப்பு 0.00000001 பிட்காயின். இப்படி ஒரு பிட்காயினையே பல கூறுகளாக பிரிப்பதால் இந்த எண்ணிக்கையே போதுமாம்.

*      நான்கு வருடங்களுக்கு ஒரு முறை குறைக்கப்படும் கூலி, அதிகரிக்கும் கணித புதிரின் சிக்கல் ஆகியவையால் அந்த உச்சபட்ச அளவை எட்டிப்பிடிப்பது 2140 ஆம் ஆண்டில் தான் முடியும் என்று சொல்லப்படுகிறது.

*      அதன்பிறகு முழுக்க முழுக்க வாங்குபவரும் விற்பவரும் கொடுக்கும் கூலி மூலமாகவே தொழிலாளிகள் இயங்க முடியும் (புது பிட்காயின் உருவாக்கம் நிறுத்தப்படுவதால்). அதனால் கூடுதல் கூலி கொடுப்பவர்களின் பரிவர்த்தனை முதலில் சரிபார்க்கப்படும். (இப்போதும் கூட இருபத்தைந்து பிட்காயின்கள் கூடவே விற்பவர்/வாங்குபவர் தங்களது பரிவர்த்தனைக்கு முக்கியத்துவம் அளிக்க சிறிது கூலி கொடுப்பதுண்டு). ஆனால் இந்த கூலி நிச்சயம் வங்கிகள்/சேவைதாரர்களின் வரியை விட குறைவாகவே இருக்கும் என்று ஊகிக்கப்படுகிறது.

இப்படி ஒரு கருத்தாக முன்வைக்கப்படும் பிட்காயின், மாற்றங்கள் அடைந்து அரசாங்கங்கள் ஏற்றுக்கொள்ளப்படும் முறைமையாக கூட மாறலாம். இந்திய ரிசர்வ் வங்கியும் ‘ஏற்கனவே ஸ்திரத்தன்மையின்றி இயங்கும் பொருளாதாரத்தில் இதை வேற தலையில் போட்டுக்கொள்ளாதீர்கள்’ என்கிற ரீதியில் சொல்லிவிட்டது. அதாவது ‘வேண்டுமென்றால் உபயோகித்துக்கொள், பிரச்சினை என்றால் என்னை கேட்காதே’ மாதிரி. அதன் கூற்றில் நியாயம் உண்டு. 2013இல் ஒரு பிட்காயினின் மதிப்பு 16000 ரூபாய்! ஆனால் அடுத்த நாளே ஒரு ரூபாய் ஆனாலும் யாரை போய் கேட்பது?. அதுமட்டுமில்லாமல் இதற்கு இவ்வளவு மதிப்பு இருக்கிறது என்கிற நம்பிக்கை அனைவருக்கும் இருக்கும் வரைதான் அந்த மதிப்பு தக்கவைக்கப்படும் (இது எல்லா பண்டங்களுக்குமே பொருந்தும்).

செய்துவிட்ட ஒரு பரிவர்த்தனையை திரும்பப்பெறுவது என்பதும் இங்கு நடக்காது. சொல்லப்போனால் இதை அடிப்படையாகக்கொண்டு தான் பிட்காயினை உருவாக்கினார் சடோஷி. செந்திலாக பார்த்து ‘நீ தெரியாமல் கூடுதலாக அனுப்பிவிட்டாய்’ என்று கவுண்டமணிக்கு பிட்காயின்களை திருப்பிக் கொடுத்தால்தான் உண்டு.

மேலும் யார் விற்கிறார்கள், வாங்குகிறார்கள் என்பது தெரியாது என்பதால் லஞ்சம், சட்டத்திற்கு புறம்பான விஷயங்களின் வியாபாரம் (போதைப் பொருட்கள், ஆயுதங்கள்) போன்றவை பெருகக்கூடும். கணினியில்/மொபைலில் மட்டும் வைத்திருப்பதால், அதில் ஏதாவது கோளாறு வந்தாலோ யாராவது ஹேக் செய்தாலோ மொத்தமும் போய் விடும் (இதை தடுக்கமுடியும்). சமீபத்தில் திவாலான பிட்காயின் இணையச்சந்தையான Mt.Gox, ஹேக்கிங் முறையில் பல்லாயிரக்கணக்கான பிட்காயின்கள் திருடுகொடுத்தது.

விக்கிபீடியா முதன்முதலில் வந்தபோது உலகம் முழுக்க இருக்கும் பயனர்கள் அவர்களாகவே தகவல்களை உருவாக்கி. மட்டறுத்து அறிவுக்களஞ்சியத்தை உருவாக்குவார்கள் என்று கருத்தை முன்வைத்தது. அப்படி ஒரு ஐடியா சாத்தியமே இல்லை, உருவாக்கப்படுவதும் பொய்க்களஞ்சியமாகத்தான் இருக்கும் என்று சொன்னவர்களே அதிகம். ஆனால் அதை மீறி இன்று கற்பனைக்கெட்டாத அளவில் தகவல்களை அள்ளித்தருகிறது விக்கிபீடியா. தொழில்நுட்பத்தில் எது எப்போது சூடு பிடிக்கும் என்று சொல்ல முடியாது. அதனால் பிட்காயின் வருங்காலத்தின் நடைமுறையாக வருகிறதோ இல்லையோ, அதைப்பற்றி இப்போதைக்கு தெரிந்து வைத்துக்கொள்வது நல்லது. அதை வைத்து விளையாடுபவர்களை இப்போதைக்கு பார்வையாளர் அரங்கில் இருந்து வேடிக்கை மட்டும் பார்க்கலாம்.

முழுதும் படிக்க..